Techniken

Ech schaffe mat 2 Techniken: Dat sënn de ganz normale Brand am elektrischen Uewen, an de Rakubrand am Gasuewen. 

 

D' Verfahren vum Rakubrand ass mäin absolunte Favorit.  All Konstwierk, dat aus dem Rakubrand kënnt ass definitiv ëmmer eent Eenzelstéck. 

 

Elektresche Brand

 

 

Héi gëtt zweemol gebrannt. Den éischte Brand  ass de Schrühbrand, an den zweeten Brand de Glasurbrand.  Bei dëse Bränn gëtt Temperatur jeweils ganz lues erop a ganz lues erof gefuer. No ungeféier 24 Stonnen, je nodeems bei waat fir enger Temperatur gebrannt gouf,  sënn d' Wierker genuch ofgekillt fir erausgehollt ze ginn.  

 

 

 

Rakubrand am Gasuewen

Rakubrand ass een alen Japanesche-Rauchbrand. Beim Rakubrand ginn d' Wierker beim 2te Brand, net wéi uewen beschriwwen, am elektreschen Uewen gebrannt,  ma am Gasuewen.  Den Ënnerscheed zum Elektresche Brand ass deen, dat hei Temperatur mam Gasreegeler ganz schnell erop gefuer gëtt. Bei der erreechter Temperatur vun 1000 bis 1020 Grad gëtt den Uewen op gemaach an dat gliddegt Konstwierk gëtt mat Zaangen aus dem Uewen geholl.  Bleift e bëssen an der Loft.  Et héiert een et kraachen a knacken. D`Krakeluren entstinn, do wou Glasur um Stéck drop war. Uschléissend  leeën ech d' Wierk direkt an d' Seemiel an engem  Zénkendëppen. Duerch d' Hëtzt vum Konstwierk fänkt de Seemiel Feier an et brennt.  Lo den Deckel drop an d' Konstwierk gëtt regelrecht geräichert duerch den Damp do wou keng Glasur um Wierk wor gëtt et schwaarz. Erstécken ech d`Feier, dann  entstinn Oxidatiounen.  Ech schaffen virun allem mat der Rakutechnik, well  déi mech absolut faszinéiert. Obschonn, des Technik vill méi aarbechts-opwenneg ass, an de Risk och vill méi grouss  ass, dat  déi fäerdeg Konstwierker gäre räissen, well se eng  sëllegen Temperaturschocken erdroe mussen, wärend dem ganzen Brennprozess,  ass de Rakubrand absolut meng léifsten Brenntechnik.

D'Experimentéieren mat verschiddenen Materialien ass einfach fantastesch an duerch déi verschidden Reaktiounen am Brennprozess, ass all Wierk eent absolut Eenzelstéck. An dat ass allkéiers de Loun,  fir den Opwand.